ரிலையன்ஸ் ஜியோ சாதனை..!

46
ரிலையன்ஸ்

இந்தியாவின் மிகப் பெரிய கோடீஸ்வரரான முகேஷ் அம்பானி, இந்திய நெட்வொர்ச் சந்தையில் ஜியோ நெட்வொர்க் நிறுவனத்தை 2016ஆம் ஆண்டில் தொடங்கினார். வாய்ஸ் கால், டேட்டா உள்ளிட்ட அனைத்து சேவைகளும் இலவசம் என்ற அதிரடியான அறிவிப்போடு களமிறங்கியதால் மற்ற நெட்வொர்க் வாடிக்கையாளர்கள் ஜியோவுக்கு மாறத் தொடங்கினர். இதன் மூலம் குறுகிய காலத்திலேயே இந்திய நெட்வொர்க் சந்தையில் ஜியோ முதலிடம் பிடித்தது. நீண்ட காலமாகவே முதலிடத்தில் இருந்து வந்த ஏர்டெல் பெரும் வீழ்ச்சியைச் சந்தித்தது. ஜியோவின் போட்டியைச் சமாளிக்க முடியாமல் வோடஃபோனும் ஐடியாவும் ஒன்றிணைந்தன. சில நிறுவனங்கள் இருந்த இடம் தெரியாமலேயே போய்விட்டன.

இந்நிலையில் புதிய சாதனை ஒன்றைத் தற்போது ஜியோ நிகழ்த்தியுள்ளது. அதாவது, இந்தியாவில் 40 கோடி சந்தாதார்களை ஈர்த்த முதல் நெட்வொர்க் நிறுவனம் என்ற சாதனையை ஜியோ படைத்துள்ளது. இந்நிறுவனம் கடந்த ஜூலை மாதத்தில் மட்டும் 35 லட்சம் பேரைத் தனது சேவைக்குள் இணைத்துள்ளதாக தொலைத் தொடர்பு ஒழுங்குமுறை ஆணையமான டிராய் தெரிவித்துள்ளது. ஜியோவின் சந்தாதார் எண்ணிக்கை தற்போது 40,08,03,819 ஆக உள்ளது. அதோடு, இந்திய நெட்வொர்க் சந்தையில் மொத்தம் 35.03 சதவீதப் பங்குகளுடன் ஜியோ தொடர்ந்து முதலிடத்தில் ஆதிக்கம் செலுத்துகிறது.

ஒட்டுமொத்தமாக தொலைத் தொடர்பு சந்தாதார்களின் எண்ணிக்கை இந்தியாவில் 116.4 கோடியாக உயர்ந்துள்ளது. ஜூன் மாதத்தில் இந்த எண்ணிக்கை 116 கோடியாக இருந்தது. இதில் மொபைல் போன் இணைப்புகளின் எண்ணிக்கை 114.4 கோடியாக உள்ளது. கிராமப்புறங்களில் 52.1 கோடியாகவும், நகர்ப்புறங்களில் 61.9 ஆகவும் இருந்துள்ளது. அரசு நெட்வொர்க் நிறுவனங்களான பிஎஸ்என்எல் மற்றும் எம்டிஎன்எல் போன்றவை பெரும் வீழ்ச்சியைச் சந்தித்துள்ளன. ஜூன் மாதத்தில் ஏர்டெல் நிறுவனம் மொத்தம் 32.6 லட்சம் பேரைத் தனது சேவைக்குள் இணைத்துள்ளது. பிஎஸ்என்எல் நிறுவனம் 3.88 லட்சம் பேரைச் சேர்த்துள்ளது.

0

LEAVE A REPLY

Please enter your comment!
Please enter your name here